MENU

TESDA tumulong sa Itogon landslide victims


September 28, 2018

Agad na kumilos ang Technical Education and Skills Development Authority – Cordillera Administrative Region (TESDA-CAR) para matulungan ang mga biktima sa naganap na landslide tragedy sa abandonadong mining site sa Itogon, Benguet.

Ito ay sa pamamagitan ng paunang ipinadalang donasyon tulad ng mga pagkain, damit, at gamot sa mga evacuation centers at skills training na makakatulong sa kanilang pagbangon mula sa idinulot na pinsala sa naganap na September 15, 2018 landslide tragedy sa nabanggit na lugar habang nananalasa ang bagyong Ompong.

Sa ulat na ipinarating ni TESDA-CAR Acting Regional Director (ARD) Engr. Manuel B. Wong, kay TESDA Director General/Secretary Guiling A. Mamondiong, 119 katao ang nagparehistro para sa skills training, kung saan 86 ang lalaki habang 33 ang babae.

Una rito, ang TESDA-CAR sa pangunguna nina ARD Wong at Provincial Director David Bungallon ng TESDA-Benguet ay nakipagpulong sa Quick Response Task Force, na pinamumunuan ng Departmment of Social Welfare and Development (DSWD-CAR) noong September 21, 2018 kung saan tinalakay ang isasagawangg tulong at intervention ng gobyerno para sa mga apektadong biktima.

Ang tanggapan ay agad na naglagay ng registration desk sa Alejo Pacalso National High School kung saan maaring magparehistro ang mga bakwit at mga miyembro ng pamilya ng mga nasawing biktima para sa skills training o retooling.

Nakipagpulong din sina ARD Wong at PD Bungallon kay Office of the Political Adviser Secretary Francis Tolentino kasama ang ibang mga ahensiya noong Setyembre 22 para magbigay ng kani-kanilang mga updates ukol sa mga ginawang interventions at tulong para sa biktima ng nasabing kalamidad/trahedya.

Bilang resulta sa isinagawang registration at profiling, sinabi ni ARD Wong na hahatiin sa dalawang batches ang pagsasanay sa 119 na mga nagparehistro sa iba’t ibang kuwalipikasyon.

Ang skills training program ay isasakatuparan sa pakikipagtulungan ng local government unit (LGU) ng Itogon.

Ang ibang registrants/biktima na hindi makakasama sa dalawang paunang pagsasanay ay isasama sa scholarship programs ngayong taon o sa susunod na taon.

Ang mga biktima ay nagpatala sa 33 kuwalipikasyon: Welding, 44; sumunod ang Driving, 33; Automotive, 26; Cooking/Cookery, 13; Housekeeping at Carpentry, tig-10; Beauty Care, 8; Baking/Bread and Pastry, 7; Manicure and Pedicure, tig-5; Slaughtering, Pastry Making, Massage Therapy, Masonry, Free Assessment (NCl/NC ll), Electrical Installation and Maintenance, tig-3; Machining, Caregiving, at Backhoe Operator, tig-2; at tig-isa naman sa Wheel Loader, Haircutting, Gas Metal Arc Welding (GMAW), Gas Tungsten Arc Welding (GTAW), Food Servicing, Electronic Servicing, Electronics, Culinary Arts, Computer System Servicing, Bookeeping at Automotive Servicing habang ang isa ay para sa free assessment (NCl/NC ll).

Ayon sa TESDA-CAR RO, may planong magpulong uli ang task force kasama ang TESDA sa October 11 upang talakayin ang pagpapatupad ng skills training program. Plano nilang na unang isasalang sa skills training ang mga nagpatala sa kursong Welding, Automotive, Transport at Konstruksiyon.

Ang training program ay planong ilunsad sa Oktubre 24 taong kasalukuyan. Ang mga kalahok ay bibigyan ng tool kits, daily allowance at libreng certification at assessment.

Samantala, iniulat din ni Wong na maliban sa nasirang sasakyan ng TESDA-CAR na nadaganan nang natumbang puno ng kahoy sa kasagsagan ng bagyong Ompong, wala namang nasira sa mga CAR Regional Offices at TESDA Technology Institutions.

Sa pinakahuling ulat, umaabot na sa 78 ang death toll sa naganap na landslide sa inabandonang mining site sa Itogon, Benguet habang 33 pa ang iniulat na nawawala.




Back to List